撇.
話說今晚8時許, 額娘帶阿嬲去散步. 正在後山山下條雞腸小徑中間幫阿嬲善後(btw今日好大收獲)之際, 阿嬲急急腳衝去山腳.
山上傳來狗仔特有的喊苦喊忽聲, 一時嘰哩咕嚕, 一時又瓜瓜瓜牛牛牛.
一個阿嬸同佢隻松鼠狗企係山腳, 見我同阿嬲望住座黑媽媽既山, 指住山上同我講:"上面有隻狗仔跌左落水渠呀."
"幾時跌架?" 此時阿嬲已經顯得好唔耐煩, 鬆毛鬆翼又要上山八埋一份.
阿嬸話, 睇怕都有成個鐘頭啦.
山上長居一班唐狗, 同阿嬲算係有些少交情, 比如話阿嬲路過山腳果陣, 久唔久就捐入山腳花槽, 靜雞雞食晒好心人留俾呢班唐狗既dinner, 飛禽大咬一餐就拍下蘿柚絕塵而去, 鬧極都唔聽, 卒之差d俾唐狗黨個堂主打瓜佢, 好在額娘及時喝止才倖免於難. 而早前有隻黑狗大左肚, 消失左一段時間. 呢隻係山上嘈到拆天既狗仔, 有可能係唐狗黨未來的總舵手.
一時心有不忍, 又費事要阿嬸一把年紀摸黑爬山, 我唯有頂硬上, 拖住果隻幫我claim左五日工傷既右腳, 一步一驚心沿住水渠旁邊條石梯爬上去. (如下圖)
( ↑石梯原貌↑ )
阿嬲到達石梯與水渠交界點果陣, 突然企定係度, 我馬上連爬帶捐地走過去一望, 哎呀, 呢個BB仔頂多三四個月大, 趴係條膝頭咁高既水渠入面嘈冤巴閉, 點跌落去架~ 個BB仔見到陌生人喊得仲大聲D添. 阿嬲好似前世未見過落水狗咁, 顯得異常激動, 一於係人地個頭殼頂度跳過來, 又跳過去, 跟住又趴係地下, 屎眼朝天咁啤住人地:"追我丫~打我丫笨~"
呢條友真係好鬼煩, 嚇到個BB仔又吠又震, 成隻老鼠咁係條水渠入面撞黎撞去.
"你係咪係都要係度搞屎棍呀!" 我一大聲凶阿嬲, 個BB又以為我想食左佢, 一支箭咁飆左去G點. 果度係個彎位直線向下, 走前一步實聽跣舖勁. BB終於知驚, 死死爪住幾抽爛葉, "點算呢後面兩隻怪獸追緊黎呀媽媽你係邊呀我要媽媽!"又係度喊餐死.
於是我輕輕抱住佢條水桶腰, 先發覺原來呢條化骨龍都已經有阿嬲咁重(大概十零磅左右), 將佢抱出水渠之後, 佢就一仆一碌咁走上山.
"阿嬲, 走啦." 阿嬲賴死唔走, 仲要走左去相反方向, 突然企左係度唔郁.
"玩夠未呀翻屋企啦!! 
!! "
跟住佢又係條水渠兩邊紮紮跳. 我好擔心佢又發現左隻田雞. (
好驚呀~) 為左呢隻頑劣的狗的將來(包括捉佢去考海關、警署同埋兼職模特兒), 我排除萬難, 躝去A點諗住擰甩佢耳仔拖佢翻屋企.
點知, 原來呢度仲有另外一個細路.
佢擒住個山坡, 聲都唔聲, 兩隻腳凌空撩來撩去. 可見佢比佢兄弟醒目, 陌生來者當前, 連屁都唔可以亂放, 否則如果阿嬲係餓左十世既老鼠, 分分鐘撕左佢黎食.
卒之又擾攘左一排, BB仔乙俾我夾硬抱出水渠, 同佢兄弟一樣, 喊到劏佢咁聲. 我將佢擺落地果下, 佢突然郁都唔郁, 好似悴死左咁.
過左好耐好耐, 佢竟然反轉個肚dum, 任我摸.
將來你一定係呢座山裡面最靚仔最醒目既楂fit人. 發左達記得關照下阿嬲喎!!
我突然覺得17 hippies好襯阿嬲.
一樣咁煩呀你
.
得得戚個衰樣真係好唔抵得佢
鑑於連日來不斷有一小撮別有用心的惡勢力人士蓄意誤解誤譯本姑娘之芳名, 藉以發動對本姑娘的肆意抹黑與惡劣攻擊, 對本港和諧社會的各項精神文明建設帶來了不良影響. 犯罪份子的手法極為惡毒, 為茲識別,舉例如下:
第一, 打著讀寫障礙的幌子對本姑娘進行肆意抹黑
部分犯罪份子在公共場合直稱本姑娘為"小肥呀"(Silvia) 或 "食屎你呀" (Cecelia)等等, 以圖達到不可告人之目的. 本姑娘鄭重重申, 犀莉婭其人連胸圍底褲淨重45KG, 目前健在, 同時日常所食不過粥粉麵飯, 間食壽司, 並不食屎. 可見有關指控是無中生有的, 是有必要嚴厲打擊的.
第二, 藉著濫造暱稱, 公然對本姑娘進行惡意攻擊
相當一部份犯罪份子以私交之便, 未經許可便濫造暱稱, 直呼本姑娘為"犀莉"(Silly), 影響之惡劣及深遠是無法估量的. 本姑娘鄭重聲明, 雖然犀莉婭其人間歇性左右不辨五穀不分, 但行事果斷且冰雪聰明, 絕不Silly. 有關攻擊是無憑無據的, 廣大人民群眾應認清事實, 提高警覺, 免使不法之徒乘機散佈謠言, 破壞來之不易的和諧穩定.
對此, 本姑娘日前已向國際死八婆權益關注小組遞交請願信, 嚴厲譴責有關人士的別有用心的惡行. 與此同時, 羊津大字典出版社負責人大隻嬲子對本姑娘之遭遇感到義憤填膺, 擬出手相助, 遂籌備於二零零八年十二月三十二日付印新版<當代羊津英漢大字典>, 特別新收錄"犀莉婭" 一條, 以正視聽:
Celia
KK: [
]
DJ: [
]
n. 犀莉婭(女子名), 特指目光犀利、思維敏銳的女子, 尾音"呀"() 表驚嘆、感慨之意.
有關人士請及時加強思想建設, 本著實是求是的精神, 有錯即改, 莫再執迷不悔.否則本姑娘將予以嚴厲批評, 絕不姑息.
此致
冚世界市民
二零零八年十一月十五日
呢條片實在是聞所未聞, Bjork個樣仍然天真無邪而鄉音未改. 睇真D原來Bjork話你知: 電視機可以睇卡通片, 有聲有公仔係度郁..... 你熄左佢(switch off)呢, 咁就點呢? 咁就乜都無架啦. 唔信, 拆開俾你睇.
..........
最令人狂 不止的都莫過於鏡頭前端係咁震係咁震既果支MIC.
睇耐D, 原來仲有隻手添!!
跟住, 原來仲有半個頭添!! 呢位阿哥你想點先?!
直接click開youtube條link, 呢段野個title簡直可以話係石破天驚鬼斧神工:
"Björk talking about her TV"
her tv! bjork自己拎部電視機出黎做科普節目!! her tv! 想必呢個肯定係sugarcubes時代的宣傳片, 意謂遲下bjork仲會talking about her 洗衣機, her 冷氣機, her 吸塵機, her 抽油煙機......
我想睇榨汁機果集, 請問有無 ?
(好崩潰)
奇就奇在竟然有人咁有魄力翻女神舊賬, 咁無離頭既片都搵得到?
查實係鞋神昕幫佢個朋友個同事個網站<<做宣傳, 做慣做熟媽劇停的昕姐立過眼一睇, 咦呢個脾約黑咪就係隔離阿花好鬼中意果條癲婆? 二話不說塞埋條link過黎, 想唔幫你貼都唔得啦. 呢招真係絕喎你昕姐~ 
貼多次個搞GAG網 http://9gag.com/ 個網站logo仲要有個ALPHA係正旁邊, 一下唔為意我仲以為係我自己整出黎既添喎!!
今日終於唔使O.T. 翻屋企之前仲買左一包仔雞胸肉俾阿嬲練習"死"同埋"發姣".
只不過翻到屋企打開度門之後, 阿嬲並未好似平時飛甴曱咁樣兜口兜面飛撲埋黎. 阿嬲到底去左邊?
佢係個煲入面.
確切說來佢係一煲岩岩整好既薑醋入面, 手腳並用欖實舊豬骨, 狀甚陶醉, 全程投入極之忘我地係咁刨係咁刨.
煲野整好左唔夠一日, 我一啖都未食過.
當然佢已經唔再係白色既小狗. 並且冷卻之後的薑醋變成一舊二舊立黐黐的大啫哩. 縱然我唔清楚布甸狗何以為布甸狗, 但我應該試下將薑醋狗賣俾Sanrio, 咁我就可以使千千萬萬埕薑醋以及我自己保有"免於驚恐的自由", 以及"免於發脾氣的自由". 如今我急須一種專門用來洗薑醋的沖涼液, 或者一部剃毛機.
我好煩惱. 我有預感兩日內我要請定假帶薑醋狗去洗胃扣喉.
(不出所料, 今晚九時許薑醋狗開始係度嘔薑醋, 嘔完仲要拿拿林食翻乾淨, 留翻夜d再嘔多次出黎, 再食翻, 再嘔.....)
你試下下次再係咁樣我就索性睇你唔到一野kum埋個煲蓋噠大個火燉熟你!!!!!!!!!
是日好煩指數: 
寫給阿嬲的人類指南 之十二
"把春樹咬爛可以嗎?"
額娘桌面的文具經常不翼而飛. 這是很詭異的事情. 詭異之處在於額娘的辦公桌正處於一個由幾百棵來自日本的春樹層層疊起的圍城之中, 連額娘都無法輕易跨越這班春樹, 更遑論翻身入內, 以瞬雷不及掩耳的速度在浩瀚的文件冢中找出一支筆, 或是一個釘書機, 然後再爬出去.
一定是春樹作怪.
於是我每次要離開座位一段時間之前, 都必須在我的電腦Mon上貼一張鮮紅的巨大的爆炸形MEMO:"警告春樹不要再移動我桌上文具. "
實驗結果證明, 春樹若不是盲的, 就是文盲.
煩惱的額娘對阿嬲說:"怎麼辦呢?"
阿嬲覺得, 額娘應該在每一支筆和釘書機上撒尿.
可是那樣子太臟了, 阿嬲也不會往跳跳虎身上撒尿呀. 額娘不同意.
"應該藏在床墊下面呀~" 阿嬲自己的床墊下面藏著一塊豬骨頭, 一隻額娘的襪,一團爛溶溶的紙巾, 兩個五文銀, 對了, 還有一支筆. 阿嬲很喜歡那支筆的筆桿; 阿嬲是一隻有文化的狗.
"但是額娘不能再帶著床墊去工作呀......而且, 額娘不在的時候, 床墊應該藏在哪裡呢?"
阿嬲想, 在地上或者沙發上挖個洞, 是個不錯的辦法.
但是額娘沒空挖洞. 取而代之, 額娘弄來一個紙箱放在桌上, 將所有文具扔進去, 不用的時候封上箱口. 箱頭紙上簽"大隻花" 防偽標誌.
然後額娘要出外工作. 兩天不回營, 陸續接到一些語氣驚惶的電話:
"你被炒了嗎?! 啊? 沒有? 沒有那你幹馬pack箱? "
阿嬲還有沒有別的辦法呢?
"春樹到底是甚麼呀? 把春樹咬爛可以嗎?"
